Преподобный Игна́тий Ломский, Ярославский

Изволением Божественнаго разума/ во внутреннюю пустыню вселился еси преподобне,/ и мирская сладострастия отрясл еси от себе,/ крепким воздержанием победил еси демонския полки/ молитвами же и постными подвиги благоукрасил еси себе,/ пустынныя труды лобызая, отче Игнатие:/ прилежно молися Госповеди, блаженне,/ от бед избавитися присно поющим тя,// и празднующих любовию святую память твою.

Воздержанием крепким Богови благоугодил еси, блаженне,/ и слезными тучами душевныя бразды напоил еси,/ ниву добродетелей, преподобне, яко сад благоцветущ возрастил еси:/ и в безмолвии и в трудех присно поучаяся, отче Игнатие,/ прилежно молися Владыце всех Христу Богу/ о иже верою и любовию празднующих святую память твою,/ да зовем ти:// радуйся, отче Игнатие, монахов удобрение.

О святый преподобне отче Игнатие, первейший веси сея просветителю, иноческаго зде жития законоположителю! Ты убо телом человек был еси, житием же яко Ангел явился еси: уста бо твоя, якоже серафимская, Бога день и нощь хваленьми прославляху, пресветлое же житие твое бысть чистоты и целомудрия зерцало. Не отрини мене, недостойного, с верою и любовию тебе покланяющагося и тебе, угодниче Христов Игнатие, сице молящагося: буди ми учитель и просветитель, душевныя страсти утишая, и телесныя болезни исцеляя, и на путь спасения наставляя. О преблаженне отче Игнатие! Милостив буди скорбней и грешней души моей, и представи ю ко Господу спасену, под кров твой притекающую, да твоим, отче, ходатайством сохранен буду от враг видимых и невидимых, и восхвалю Бога, в Троице Святей прославляемаго, Отца, и Сына, и Святаго Духа, ныне и присно, и во веки веков.